Ultimas novas de TagenATA

Tagen Ata con Namórate de lingua

Tagenata — Mon, 22 Feb 2010 10:48:46 GMT

Tagen Ata traballa a dinamización na rede da campaña Namórate da lingua!
Esta segunda edición da campaña quere acadar a participación da mocidade na creación de slogans ao redor dos valores da lingua.
A acción está orientada a rapaces e rapazas de 14 a 16 anos de idade dos centros de ensino de Santiago.
Namórate da lingua volve con máis forza para convidar á mocidade a unha cita a cegas, para promover a creatividade a través da web da campaña, das fotografías e dos slogans.
Tes unha cita a cegas! Ven e namórate da lingua!
www.namoratedalingua.com

Galego en liña no terceiro sector

Tagenata — Tue, 9 Feb 2010 22:39:13 GMT

Esta semana comezou en Igaxes, o Instituto Galego de Xestión para o Terceiro Sector, un novo curso en liña de formación e reciclaxe en lingua galega.
Formación en rede, o espazo web de teleformación de Tagen Ata, amplía deste xeito a súa oferta formativa, dirixida a unha clientela pertencente a moi diversos sectores socias.
Neste momento debemos poñer en valor o noso papel formador e innovador nun sector de traballo de especial importancia para a inclusión social e o desenvolvemento.

Presentamos informe para o Concello de Pontevedra

Tagenata — Tue, 9 Feb 2010 22:34:11 GMT

O 16 de decembro Tagen Ata presentou na Comisión Interdepartamental de Seguimento da Ordenanza de Impulso de Uso do Galego as principais conclusións do estudo levado a cabo sobre o grao de cumprimento de dita ordenanza. O estudo fundamentouse na implementación dun cuestionario de 48 preguntas que foi cuberto polo funcionariado do concello. A investigación non só se centrou en indagar sobre o cumprimento do establecido na ordenanza, xa que tamén achega datos a respecto de usos, competencias e actitudes lingüísticas do conxunto do funcionariado. Este estudo é o primeiro que se fai en Galicia sobre os contidos e o cumprimento dunha ordenanza municipal de normalización lingüística.

O Concello de Fene aproba o II Plan de Igualdade

Tagenata — Wed, 9 Dec 2009 19:01:06 GMT

O pasado 5 de novembro a corporación municipal de Fene aprobou por unanimidade o II Plan de igualdade de oportunidades entre mulleres e homes 2010-2013.

Tanto o Informe de Diagnose previo como o documento do Plan foron redactados por Tagen Ata e son o resultado dun proceso de participación social de cuxa coordinación tamén se encargou a nosa empresa. Anteriormente Tagen Ata elaborara o Informe de Avaliación do I Plan de Igualdade. Estes documentos poden consultarse na páxina web do concello de Fene.

Tagen Ata estrea os seus novos cursos en liña

Tagenata — Wed, 11 Nov 2009 20:36:06 GMT

Este outono Tagen Ata inaugura a súa nova plataforma de cursos en liña.

Na próxima semana comezan dous cursos de Lingua Galega Hoxe no Concello de Vigo. Cunha grande demanda de asistentes iniciamos un novo curso de formación e posibilidades para todo o noso futuro alunado.

No próximo mes abriremos un curso ao público, con posibilidade de matrícula individual. Trátase deste mesmo curso, Lingua Galega Hoxe, para todas aquelas persoas que desexen actualizarse en lingua galega.